प्रस्तावना

आनंद अनुभव! नक्की काय म्हणायचं आहे मला? हा आनंदाचा अनुभव आहे की अनुभवाचा आनंद? खरतर दोन्ही! आनंद घ्यावा आनंद द्यावा आनंद बहरावा अशी जर वृत्ती असेल तर.....?

खूप काही गोष्टींनी आपण भारावून जातो. त्या आपल्याला आनंद देतात. ते क्षण आठवण्यात ते कोणाबरोबर तरी share करण्यात आपण धन्यता मानतो. कदाचित तिथेच थांबतो. हेच क्षण जर आणखी खूप जणांपर्यंत पोहोचले तर? जे जे आपणासी ठावे ते ते इतरांसी दावावे इथवरच्याच वचनाशी माझं नातं आहे. शहाणे करून सोडावे वगैरे उद्दिष्ट दूरान्वयानेही मनात नाही कारण हे फक्त माझ्या मनी प्रकटले ते इतुकेच आहे.

या अतिशय मर्यादित उद्देशाने आपण भेटत राहू या, या माझ्या ब्लॉगवर. सध्या तरी आठवड्यातून एकदा असं मी ठरवलं आहे. पण ते स्थूलमानाने. आज या प्रस्तावनेनंतर मी जे अनुभव तुमच्याबरोबर share करणार आहे ते प्रवासवर्णन आहे का मला सांगता येणार नाही. प्रवास हे खूपदा निमित्त असतं. आपुलाचि वाद आपणासि अशी संधी उपलब्ध होते ती प्रवासात. अशा वेळी टिपलेल्या या गोष्टी हे अनुभव! नाव काहीही द्या.

आपल्या येणा-या प्रतिक्रिया दिशादर्शक असतील. मी त्यांची कायम वाट बघत असणार आहे.